المُخبر الاقتصادي+ | كيف تخطط أمريكا لإعادة الصين إلى "العصر الحجري"؟ هل تصبح الصين دولة متخلفة؟
عملوها في هواوي وعملوها في روسيا والدور دلوقت جه على الصين كلها الأمريكان لأول مرة في تاريخهم بيهاجموا الصينيين بالشكل العنيف دا والهدف الرئيسي من هجومهم الأخير هو قطاع التكنولوجيا الصيني اللي أمريكا مش عاوزة تعطله أو تعرقل تقدمه وإنما عاوزة ترجعه لورا 50 سنة على الأقل العضو المنتدب لبنك الاستثمار الصيني China Renaissance بيقول لفايننشال تايمز إن الإجراءات الأمريكية الأخيرة هترجع الشركات الصينية للعصر الحجري باختصار دونالد ترمب دمر هواوي فخر قطاع التكنولوجيا الصيني وجو بايدن جاي النهار دا عاوز يقضي على قطاع التكنولوجيا الصيني بالكامل ويخلي الصين تعيش طول عمرها معتمدة على التكنولوجيا الأمريكية زيها زي روسيا في سبتمبر اللي فات جاك سوليفان مستشار الأمن القومي الأمريكي طلع اتريق على روسيا بعدما أمريكا منعتها من الحصول على احتياجاتها من أشباه الموصلات وهددت أي حد يبيع لها شريحة بربع جنيه وقال نصاً الروس دلوقت بيشغلوا الدبابات بتاعتهم بالرقائق الإلكترونية بتاعة غسالات الصحون لكن اللي الأمريكان عملوه في الروس لا يقارن أبداً باللي هيبدؤوا يعملوه في الصين اعتباراً من 21 أكتوبر 2022 في السنين الأخيرة الطموحات التكنولوجية للصين كانت بتخلي المفكرين الاستراتيجيين في الولايات المتحدة ما يناموش الليل بسبب خوفهم من وصول بكين لمرحلة الهيمنة واللي كانوا شايفينها مسألة وقت علشان كدا الأمريكان قرروا يجيبوا من الآخر ويخلصوا من وجع الدماغ دا من خلال شن عملية اغتيال واضحة للقدرات التكنولوجية الصينية تم الإعلان عن تفاصيلها في بداية أكتوبر لكن في نفس الوقت اللي الرئيس الأمريكي بيشن فيه هجوم كاسح على قطاع التكنولوجيا في الصين الرئيس الصيني بيتحداه وطلع بعدها بأيام بيؤكد إن الصين هتنتصر إيه بقى اللي بيحصل بالضبط؟ وإيه هي تفاصيل الخطة الأمريكية لتدمير قطاع التكنولوجيا الصيني؟ وليه الخطة دي قلبت العالم كله؟ وإزاي أمريكا هتجبر الكل أمريكي وغير أمريكي على الالتزام بالإجراءات اللي فرضتها ولسه هتفرضها على الصين؟ وإزاي الصين ممكن تتحدى الأمريكان وتواجه عقوباتهم؟ دا جزء من اللي هندردش فيه مع بعض في حلقة النهار دا أنا أشرف إبراهيم ودا المخبر الاقتصادي+ في 12 أكتوبر 2022 الولايات المتحدة نشرت أخيراً وبعد طول انتظار النسخة الأحدث من استراتيجيتها للأمن القومي أو National Security Strategy ودا بعدما الرئيس الأمريكي جو بايدن وقع عليها المهم في التقرير دا بايدن بيوصف جمهورية الصين الشعبية باعتبارها التحدي الجيوسياسي الأكثر أهمية بالنسبة لأمريكا وقال كمان على فكرة بقى أنا الإدارة بتاعتي فاهمة كويس جداً إن الصين عندها النية والقدرة المتزايدة على إعادة تشكيل النظام الدولي لصالحها الكلام الموجود في التقرير دا واللي فيه هجوم مباشر على الصين ما كانش مفاجئ لأي حد متابع للي بيجرى بين البلدين مؤخراً ودا ببساطة لإن التقرير المهم دا صدر بعد 5 أيام بس من استهداف إدارة بايدن لقطاع التكنولوجيا الصيني بإجراءات تصعيدية غير مسبوقة في 7 أكتوبر اللي فات مكتب الصناعة والأمن BIS التابع لوزارة التجارة الأمريكية أصدر مجموعة من اللوائح اللي بتهدف لتقييد قدرة الصين على شراء وتصنيع الرقائق الإلكترونية المتقدمة من الآخر كدا اللوائح دي هدفها إن الصين تتمنع من شرا رقائق إلكترونية متطورة وفي نفس الوقت تتمنع حتى من تصنيعها عندها من الآخر كدا الأمريكان بيقولوا للصينيين من خلال اللوائح دي لا هنخليكم تعرفوا تشتروا ولا حتى تصنعوا عندكم ومش هتوصلكم شريحة متطورة غير بإذن مسبق مننا ودا معناه حرمان الصين بشكل كامل من الرقائق الإلكترونية اللي داخلة في تشغيل كل حاجة من أول الصاروخ لحد الغسالة طب إزاي الأمريكيين هيعملوا دا؟ يعني إزاي ممكن يقطعوا الماية والنور بالشكل دا على دولة كبيرة زي الصين في قطاع ضخم وعالمي زي أشباه الموصلات في حين إن الأمريكيين أصلاً مش هما أكبر منتج لأشباه الموصلات في العالم؟ هقول لك أولاً أمريكا بالفعل مش بتسيطر على صناعة الرقائق الإلكترونية أو صناعة أشباه الموصلات العالمية بشكل عام وكلنا شفنا خيبتها التقيلة خلال أزمة كورونا وتعطل كتير من شركاتها ومصانعها بسبب نقص الرقائق الإلكترونية اللي حليفتها تايوان هي رقم 1 في تصنيعها ولكن برغم كدا الرئيس الأمريكي يقدر يسوق صناعة أشباه الموصلات العالمية كلها على بعضها ويتحكم فيها وهو قاعد في مكتبه ودا ببساطة لأن بلده بتسيطر على أكتر الأجزاء حساسية وأهمية في سلسلة التوريد بتاعة أشباه الموصلات وأنا هنا بتكلم على الـ Chokepoints أو نقاط الاختناق الموجودة في سلسلة التوريد الخاصة بأشباه الموصلات وقبل ما أكمل كلامي وعلشان تاخد بالك من معنى كلمة نقطة اختناق خليني أضرب لك مثال بسيط النهار دا أكبر شركات الأدوية والمستحضرات الصيدلانية في العالم معظمها شركات أمريكية والشركات دي ممكن الصين توقف حالها بكرة الصبح لو حبت ودا هيكون من خلال استغلال سيطرتها على صناعة المواد الفعالة العالمية الصينيين هما ملوك تصنيع المواد الفعالة اللي داخلة في كل الأدوية وبالتالي المواد الفعالة في الحالة دي بقت نقطة اختناق في سلسلة التوريد بتاعة صناعة الأدوية لو الصين ضغطت على النقطة دي تخنق الصناعة وتزعلنا كلنا وأولنا الأمريكان نفس الفكرة في صناعة أشباه الموصلات بصوا يا جماعة صناعة أشباه الموصلات فيها بشكل أساسي 4 نقاط اختناق الضغط على أي واحدة فيهم يخنق سلسلة التوريد كلها أمريكا بقى من خلال اللوائح اللي فرضتها ضد الصين في 7 أكتوبر واللي المفروض إنها تكون كلها دخلت حيز التنفيذ في 21 أكتوبر بتستغل سيطرتها على نقاط الاختناق دي وخلينا ناخدهم واحدة واحدة بالترتيب علشان تاخد بالك إزاي الأمريكان مش عاوزين يسيبوا للصينيين أي ثغرة يعدوا منها أول حاجة اللوايح الجديدة اللي بتحاول تعملها هي خنق صناعة الذكاء الاصطناعي الصينية من خلال منع الصين من الوصول للرقائق الإلكترونية المتطورة اللي بيتم استخدامها في تطبيقات الذكاء الاصطناعي الأمريكان والصينيين فاهمين كويس جداً إن تكنولوجيا الذكاء الاصطناعي هتحدد في المستقبل ميزان القوة العسكرية والاقتصادية اللي هيسبق في الذكاء الاصطناعي هيتفوق على التاني عسكرياً واقتصادياً الأمريكان لحد وقت قريب كانوا بيمنعوا بيع الرقائق المتطورة للكيانات التابعة للجيش الصيني وكانوا بيسمحوا بيها للشركات التجارية الصينية بشكل طبيعي ولكن مؤخراً اكتشفوا إن دي سياسة فاشلة ما بتمنعش الجيش الصيني من إنه يحط إيده على الرقائق دي في النهاية ودا ببساطة لأن الشركات الصينية الخاصة والجيش الصيني زيتهم في دقيقهم في الآخر يعني اللي يدخل جيب أي شركة خاصة صينية كأنه دخل جيب الجيش الصيني بالضبط على سبيل المثال في 2015 الرئيس الأمريكي السابق باراك أوباما منع شركة إنتل الأمريكية من إنها تبيع شرايحها المتطورة المعروفة باسم زيون لصالح مراكز الأبحاث المرتبطة بالجيش الصيني زي الجامعة الوطنية لتكنولوجيا الدفاع NUDT والشركة فعلاً توقفت عن بيع الرقائق دي للجيش الصيني والجهات المرتبطة بيه بس هل دا معناه إن الجيش الصيني ما قدرش يوصل للشرايح دي بعدما قرار أوباما دخل حيز التنفيذ؟ طبعاً لا النهار دا وأنا بكلمكم كتير من الحواسيب العملاقة التابعة للجيش الصيني شغالة بأحدث وأكبر شرايح زيون بتاعة إنتل إزاي الصين حطت إيدها على الشرايح دي؟ باختصار من خلال شركاتها التجارية الخاصة واللي بعضها وهمي واللي راحت تشتري من إنتل الشرايح على إنها بتشتريها لنفسها مش للجيش علشان كدا الأمريكان في اللوايح الأخيرة قال لك ما حدش يبيع شرايح متطورة للصين كلها من بابها لا جيش ولا شركات لأن الاتنين في النهاية واحد والكلام دا موجه بشكل أساسي للعالم كله مش للشركات الأمريكية بس طب افترضنا الصين قالت للأمريكان مش عاوزين منكم ولا من غيركم حاجة إحنا هنصمم الشرايح بتاعتنا بنفسنا وهنصنعها عند الغير دا كلام لطيف جداً وهياخدنا لنقطة الاختناق التانية اللي الأمريكيين بيسيطروا عليها خليني أقول لك إن الأمريكان كانوا عارفين إن الصينيين هيفكروا في الحركة دي علشان كدا سبقوهم وقطعوا عليهم الخطوة دي من خلال إدراج بند في اللوايح الجديدة بيمنع الشركات اللي بتملك برامج التصميم بتاعة الرقائق الإلكترونية إنها تبيع البرامج دي للصين الحركة دي عملوها في مين لو تفتكروا؟ في هواوي علشان كدا ضروري تشوفوا حلقة هواوي اختفت فين لأن موضوعها مرتبط باللي بنحكي فيه دا المهم زي ما قلت لكم قبل كدا في حلقة هواوي فيه 4 شركات أمريكية بتسيطر على صناعة السوفت وير المستخدم في تصميم الرقائق الإلكترونية الشركات دي بقت ممنوعة النهار دا من إنها تبيع للصين السوفت وير بتاع تصميم الرقائق والمعروف باسم نظم التصميم الإلكتروني الآلي أو Electronic Design Automation والمعروف اختصاراً باسم EDA الصينيين عندهم تقريباً 28 شركة شغالة في تصميم الرقائق الإلكترونية الشركات دي من هنا ورايح هتتمنع من استخدام أنظمة الـ EDA أو السوفت وير الأمريكي بتاع التصميم وبالتالي الشركات دي حالها هيوقف واحد هيقول لي طب مش ممكن الصينيين يقرصنوا البرامج دي أو يحصلوا عليها بشكل غير قانوني ويصمموا عليها؟ الحتة دي ما عدتش على الأمريكان وزارة التجارة الأمريكية قالت في اللوايح الجديدة أي شركة في العالم هتصنع للصين تصميم لشريحة متطورة معمول باستخدام سوفت وير أمريكي هتتعاقب من خلال إنها تتمنع من الحصول على آلات تصنيع الرقائق وخد الكبيرة بقى الكلام دا بينطبق كمان حتى على برامج التصميم اللي الشركات الصينية اشترتها بشكل شرعي قبل اللوايح الأخيرة طيب هل فيه بدايل لبرامج التصميم بتاعة أمريكا؟ فعلياً لا من الصعب جداً إنك تلاقي أي شريحة أو رقاقة إلكترونية متطورة في العالم مش مستخدم في تصميمها سوفت وير أمريكي دا معناه إن الـ 28 شركة اللي شغالين في مجال تصميم الرقائق الإلكترونية في الصين حالهم هيقف تماماً وهيقفلوا طب إيه رأيك لو الصينيين قرروا يقرصنوا برامج التصميم الأمريكية ولكن بدل ما يروحوا يصنعوا عند الغير يصنعوا بنفسهم حلو الكلام دا بس علشان تصنع رقائق هتحتاج الآلات والمعدات المتطورة جداً اللي بتصنع الرقائق هل الصين تقدر تحط إيدها على المعدات دي؟ مع الأسف مضطر أقول لك إن الأمريكيين عاملين حساب الحركة دي كمان في اللوايح الجديدة لأنهم متوقعين دا من الصين برضو الأمريكان استغلوا سيطرتهم على نقطة الاختناق التالتة في سلسلة توريد أشباه الموصلات وهي سيطرتهم على سوق معدات وآلات تصنيع الرقائق الإلكترونية فيه 5 شركات في العالم بتسيطر على سوق آلات تصنيع أشباه الموصلات والشركات دي هي ASML الهولندية وTokyo Electron اليابانية وأبلايد ماتيريالز الأمريكية وKLA Corp الأمريكية وLam Research Corp الأمريكية الشركات دي النهار دا بقت ممنوعة إنها تبيع المعدات والآلات المستخدمة في تصنيع الرقائق الإلكترونية المتطورة للصين وقبل ما أكمل واحد هيقول لي هو إيه علاقة ASML الهولندية وTokyo Electron اليابانية بالموضوع؟ هما الأمريكان ليهم حكم عليهم علشان يقولوا لهم يبيعوا لمين وما يبيعوش لمين؟ أقول لك آه الأمريكان ليهم ونص كمان باختصار ASML وTokyo Electron الاتنين بيستخدموا تكنولوجيا أمريكية في تصنيع الآلات والمعدات بتاعة أشباه الموصلات ودا وفق قاعدة المنتج الأجنبي المباشر FDPR اللي الأمريكان حاطينها القاعدة دي بتديهم الحق في إنهم يتحكموا في الشركات دي والأتخن منها بالمناسبة هبقى أكلمكم في حلقة لوحدها عن القاعدة دي بالتحديد لأنها عاملة زي الكرباج اللي أمريكا تقدر تجلد بيه أتخن دولة في العالم لو حبت لو حابين نعمل الحلقة دي عرفوني في التعليقات المهم خلونا نرجع بس للقيود اللي الأمريكان فرضوها على الشركات اللي بتصنع آلات ومعدات تصنيع أشباه الموصلات اللوايح الجديدة بتستهدف بشكل أساسي 3 أنواع من الرقائق الإلكترونية أول حاجة هي الشرايح المنطقية أو الـ Logic Chips دلوقت ما ينفعش أي شركة في العالم تروح تبيع للصين أي آلة أو معدة بتستخدم في تصنيع الشرائح المنطقية الـ 16 نانومتر والأعلى منها بدون ما تاخد ترخيص مسبق من وزارة التجارة الأمريكية طبعاً اللي متابعني أكيد فاهم النقطة دي بس خليني أوضحها برضو كلما عدد النانومتر في الشريحة قل كلما كانت الشريحة دي متقدمة المهم خدوا بالكم هنا من نقطة خطيرة جداً الصين بقى لها 3 سنين وتحديداً من 2019 بتصنع بالفعل من خلال شركتها SMIC الشرائح الـ 14 نانومتر ودي شرايح أعلى من الشرايح الـ 16 نانومتر اللي الأمريكان دلوقت بيمنعوا أي شركة إنها تبيع للصين معدة بتصنعها هي أو الأعلى منها دلوقت بقى إيه هو موقف الشرايح الـ 14 نانومتر اللي الصينيين بيصنعوها أصلاً؟ هقول لك أولاً الصين بما إنها بتصنع الـ 14 نانومتر يبقى هي بالتأكيد عندها المعدات اللي بتصنعها دا شيء منطقي صح؟ لكن كونها بتمتلك المعدات دي مش معناه إنها هتقدر طول الوقت تستخدمها في الإنتاج وعلشان أوضح لك خليني أضرب لك مثال النهار دا أي شركة طيران في العالم أسطول الطيارات بتاعها مش هيخرج عن طيارات بوينج الأمريكية أو إيرباص الأوروبية إنت كشركة طيران سواء اشتريت الطيارة من بوينج أو إيرباص فإنت مش بتشتريها وتروح لحالك كدا لا إنت بتعمل معاهم عقود للصيانة لأنه دي طياراتهم وما حدش يعرف يعمل لها صيانة أو يصلحها غيرهم لو فرضنا إن بوينج أو إيرباص حد منهم جه بكرة الصبح مزاجه مش رايق وقال لك مش هنعمل لك صيانة للطيارة فإنت ساعتها مش هتقدر تحرك الطيارة من على الأرض ومش هتعرف تستخدمها رغم إنها ملكك نفس الفكرة في صناعة أشباه الموصلات شركات تصنيع المعدات زي ASML الهولندية وغيرها لما بتبيع أي خط إنتاج فهي في نفس الوقت مسؤولة عن صيانته لو امتنعت الشركة دي عن صيانته لأي سبب الخط هيقف مشكلة الصين بقى هي إن شرايحها الأكثر تقدماً النهار دا اللي هي الـ 14 نانومتر بتنطبق عليها اللوايح الجديدة بتاعة الأمريكان اللي تخص المعدات ودي طبعاً مش صدفة الأمريكان بموجب اللوايح بتاعة وزارة التجارة ممكن يمنعوا شركات تصنيع المعدات إنها تعمل صيانة لخطوط شرايح الـ 14 نانومتر الصينية الأمريكان لو رفضوا يدوا للشركة المصنعة للآلات الإذن بالصيانة كدا خطوط الـ 14 نانومتر بتاعة الصين هتبقى برا الخدمة قريب وبكدا الصينيين يروحوا بقى يصنعوا الشرايح الـ 28 نانومتر اللي موجودة في السوق من 2011 يعني هيرجعوا ورا 11 سنة ومش بس كدا الأمريكان برضو قال لك ما فيش شركة في العالم هتبيع للصينين معدة أو آلة بتستخدم في تصنيع رقائق الذاكرة العشوائية الديناميكية الـ DRAM الـ 18 نانومتر أو الأكثر تطوراً منها إلا بإذننا وبالنسبة لرقائق الـ NAND Flash فالكل أمريكي وغير أمريكي ممنوع برضو من إنه يبيع للصين المعدات اللي بتصنع الـ NAND Flash الـ 128 Layers والأعلى منها الصين علشان تتجاوز القيود الأمريكية قليلة الأدب دي ما قدمهاش غير إنها تجيب من الآخر بقى وتصنع بنفسها المعدات والآلات اللي بتستخدم في تصنيع الرقائق الإلكترونية هل الصين تقدر تصنع الآلات دي؟ السؤال دا ياخدنا لنقطة الاختناق الرابعة في سلسلة التوريد اللي مخلية الأمريكان راكبين على الصينيين وماسكينهم من زورهم بصوا يا جماعة هنفترض إن الصينيين عندهم الدراية التكنولوجية أو الـ Know How بتاع صناعة معقدة جداً جداً زي آلات تصنيع الرقائق الإلكترونية اللي بتعتبر من أعقد الصناعات في العالم مع إنهم في الواقع ما عندهمش الدراية دي بس هنفترض إنها معاهم برغم كدا الصينيين مش هيعرفوا يصنعوا الآلات دي ودا لإن الأمريكيين عاوزين كدا في اللوايح الأخيرة وزارة التجارة الأمريكية بتمنع أي شركة في العالم إنها تبيع للصين أي مكون من المكونات اللي بتدخل في تصنيع معدات أشباه الموصلات إلا بإذن مسبق منها شفت القيود وصلت لحد فين؟ آه يا ولاد العم سام ومن سوء حظ الصين أنه مستحيل حرفياً بكرر تاني مستحيل مستحيل إن أي شركة في العالم تقدر تصنع آلة أشباه موصلات بدون ما تستخدم في تصنيعها تكنولوجيا أو براءات اختراع أمريكية دا معناه إن الصين لو عاوزة تصنع معدات أشباه موصلات تروح بقى تبدأ من الأول خالص وتعمل أبحاث ودراسات وتراكم تكنولوجيا وبراءات اختراع تكون بتاعتها هي علشان تستخدمها بدون ما الأمريكان يعترضوا يعني من الآخر كدا الأمريكان بيقولوا للصينيين كل الأبحاث وبراءات الاختراع اللي إحنا عملناها في آخر 70 سنة تقريباً في المجال دا عيدوها إنتوا من الأول تاني وربنا معاكم يعني الأمريكان من الآخر كدا مقفلينها على الصينين من كل حتة مش سايبين لهم ثغرة يعدوا منها وخد دي كمان علشان تعرف الأمريكيين لأي درجة مصممين على إنهم يخنقوا قطاع التكنولوجيا الصيني ويرجعوه لورا مش بس يعطلوه النهار دا بموجب اللوايح الجديدة أي شخص معاه جواز سفر أمريكي أو جرين كارد يعني مش أمريكي لكن مقيم بشكل قانوني في الولايات المتحدة بقى ممنوع من إنه يشارك في دعم أو تطوير صناعة الرقائق الإلكترونية في الصين كدا الأمريكان بجرة قلم حرموا صناعة أشباه الموصلات الصينية من جزء كبير من أفضل العقول اللي شغالة فيها فيه يا جماعة 16 شركة من شركات أشباه الموصلات في الصين شغال فيها ما لا يقل عن 43 مسؤول تنفيذي كبير معاهم الجنسية الأمريكية الناس دي كلها شغالة في مناصب بنسميها بالتعبير الدراج C Suite أو مناصب تنفيذية مهمة وتقيلة لها دور في توجيه ونجاح الشركة زي الرئيس التنفيذي ونائب الرئيس ورئيس مجلس الإدارة وبحسب الاستخبارات التايوانية فيه 200 شخص على الأقل معاه جواز سفر أمريكي شغالين في شركات أشباه الموصلات الصينية الناس دي راحت الصين ومعاها خبرات كبيرة في الصناعة اكتسبتها من خلال الشغل على مدار سنين في أكبر شركات أشباه الموصلات في العالم سواء في أمريكا أو تايوان أو كوريا الجنوبية واليابان المهم الناس التقيلة دي بقى قدامها دلوقت حل من 2 يا إما تسيب وظايفها في شركات أشباه الموصلات الصينية يا إما تتخلى عن الجنسية الأمريكية بس السؤال بقى مين عنده استعداد يتخلى عن جواز سفره الأمريكي؟ مسؤول تنفيذي عن الموارد البشرية في إحدى شركات أشباه الموصلات الصينية بيقول لفايننشال تايمز إن منع أمريكا لحاملي جواز سفرها من إنهم يشتغلوا في شركات أشباه الموصلات الصينية في رأيه يعتبر قنبلة أكبر من منع الصين من الوصول لمعدات أشباه الموصلات لسان حال الراجل دا امنعوا عننا المعدات بس ما تحرموناش من المواهب بتاعتنا وخدوا بالكم من حاجة الناس اللي إحنا بنتكلم عليها إن معاها جواز سفر أمريكي مش كلها أمريكية الأصل كتير منهم أصله صيني أو تايواني لكنه راح درس واشتغل في أمريكا وخد جواز سفرها علشان كدا المسؤول التنفيذي دا بيشتكي لفايننشال تايمز وبيقول إحنا لازم نلاقي طريقة نقدر من خلالها نحافظ على الناس دي لأنها سلاح أساسي في تطوير التكنولوجيا في الصين ولكن دا مع الأسف صعب لأن أغلبهم ما عندوش استعداد إنه يستغنى عن جواز سفره الأمريكي وطبعاً وزارة التجارة الأمريكية عارفة إن دا اللي هيحصل علشان كدا حطت القواعد بالشكل دا ملخص اللوايح الأمريكية باختصار يا شباب هي إن أمريكا مش هتسمح للصين إنها تشتري رقائق متقدمة تستخدمها في الذكاء الاصطناعي أو أي تطبيقات عسكرية ولو حاولت تصمم الرقائق دي هتمنعها ولو حاولت تشتري معدات هتمنعها ولو حاولت تصنع المعدات هتوريها النجوم في عز الليل دا غير إنها هتسحب منها المواهب والخبرات اللي بيساعدوها حالياً في صناعتها طب الصين هتقف تتفرج على الكلام دا؟ أكيد لا في 16 أكتوبر الرئيس الصيني شي جين بينغ قال في تصريحات ليه أثناء المؤتمر الـ 20 للحزب الشيوعي الصيني إن الصين هتركز بقوة على إجراء البحوث العلمية وهتنتصر بحزم في المعركة الدايرة حوالين عدد من التقنيات الأساسية طبعاً هو هنا بيتكلم بشكل غير مباشر على الأمريكان واللي عملوه مع بلده فيما يخص أشباه الموصلات طب الصين هتعمل إيه بالضبط؟ الراجل ما وضحش أي تفاصيل وكويس إنه هو ما وضحش الصراحة علشان نبقى نيجي نكلمكم على الموضوع دا في حلقة لوحدها مصلحة يعني المهم بس قبل ما أنهي الكلام معاكم فيه سؤال لازم أي حد سمع كل الكلام اللي فات دا يسأله لنفسه هو ليه أمريكا بتحاصر قطاع التكنولوجيا الصيني بالشكل العنيف دا؟ هقول لك باختصار الأمريكان مؤمنين إنهم علشان يمنعوا الصين من التفوق عليهم في القطاع الحساس دا ما ينفعش يعملوا معاهم حاجة أقل من كدا كان لازم يهاجموا الصينيين بالعنف دا أي إجراءات تانية أقل من كدا ما كانش هيبقى ليها لازمة لأن الصينيين هيعرفوا يلتفوا عليها علشان كدا اللوايح الأخيرة قررت تقفل الماية والنور وما تسيبش ثغرة الصينيين يعدوا منها وبمناسبة النقطة دي عندي سؤال لحضراتكم برأيكم هل الصين هتقدر تتجاوز الحصار الأمريكي الكاسح المفرض على قطاعها التكنولوجي وللا هتستسلم للأمر الواقع؟ هتابع إجاباتكم في التعليقات وبالمناسبة قبل ما أنسى أنا عارف إنها النجوم في عز الظهر ولكن قصدت أختبر تركيزكم وفي النهاية يا ريت لو عجبتك الحلقة دي وحابب تشوفنا تاني اشترك في القناة واستنانا في حلقات جديدة بإذن الله سلام
2022-10-23 11:59
